Toal en Taiken. 30-10-2006 ...terug naar overzicht...

Bach, Hoogezand Sapmeer ,Vaaierhoezen

Wat hebben dij drij mit n kander vandoun? t Het te mokken mit n poar opmaarkens van leesders van leste Toal en Taiken.
Bach. Ien t stukje mit tuttel ‘Daam en Bach’ heb k mie mishotjet. Over tekst bie t ploatje of over t ploatje bie tekst was verkeerd kozen. Ien mien aanbidding van J.S.Bach har k ien mien volle overgoave n buuste van mien grode inspiroator op pioano rekend. k Mouk n foto en zunder goud noar kop van man te kieken stuurde ik t ploatje noar meneer Groenbroek ien Scheemde tou en hai, overtuugd van mien wisse oard, kwam Beethoven mit zien wat toestereg oetzaind heufd noast tekst te stoan. Glad verkeerd. Mor nog slimmer was t dou t verhoal ging over t symbool van ovverveerdeghaid en van Luther. Vogel dij ien t woapen van Daam pronkt. t Is nait de ien zien borst prikkende swoan mor, Damsters waiten t altmoal, t is pelikoan. ‘Slim,hail slim. Wat was der toch bie t stukje schrieven ien mie voaren?’
Aan dij mensen dij ik doardeur braid roakt heb vroag k vergiffenis. Mor, zel k joe zeggen, muziek van J. S. Bach zel mie aaiweg blieven bekoren, vanof nou positief beienvlouden en zien fizelemie, geloat, zel mie vanof nou blieven heugen.
Hoogezand-Sapmeer, Vaaierhoezen? Baidend dingen ze mit om n bult geld op waal te slepen. Ien Toal en Taiken schreven wie over t AVRO, TV pergram “de Restauratie” woar mensen kennen bepoalen wel van vieftien monumenten n puut vol geld zel beuren om restauroatsie oet te kinnen voeren. Dou k t stukje schreef was nog nait bekend dat ook Histirische Scheepswerf Wolthuis mit zol doun en doatum van oetzenden was ook nog nait tot mie komen. k Schreef bloots over t laifleke kerkje ien Vaaierhoezen dij o zo neudeg tou is aan restauroatsie. n Bizunder weerdevol monument dat eertieds stoef onder aan diek van waddenzee ston en woarvan zien meulen wied over t wad zichtboar was.
De slim aktieve Vaaierhoesters hebben alle zaailen biezet om Vaaierhoezen ien de kieker van n bult lu te drieven. 17.000 hail schiere ansichtkoadjes hadden ze drukt mit oorspronkeleke oetzenddoatum der op. n Bult muite en waark hebben d entousiaste Vaaierhoesters oet stro zet. Doar nait van. Mor aigeleks het Vaaierhoezen nou ien stried om mensen waarm te mokken n extro handicap. AVRO het oetzeddoatum verschoven. Aansichtkoadjes, nou mit vaalse doatum, veurgees mokt. Boetendes, mor dat was bekend, t achterlaand van Vaaierhoezen is Lauwersoog mit zummers touristen en waddenzee woar de boudel mor dun bevolkt is mor woarien Vaaierhoezen n speerpunt functie hebben kin. Alle redens om toch mor hail stief te overwegen wel dat joen stem mout kriegen…Vaaierhoezen… of …?
Als ie dit lezen zel t zo wezen dat 25 november om 20.20 op Nederland 2 eerste oetzenden west is woar Vaaierhoezen ien aal zien volhaid aan bod komen is. Op 23 december is finoale pland. t Zel ons nij doun.

Toal en Taiken. 34 G
Lains, 30-10-2006.
Piet Huizenga
Nog n fotoke vanof internet ;
# ‘Mien grode aanpidjerder om wat oet ‘ sro te zetten. J.S.Bach.’
En ain dij oet mien toustel rolde;
# ‘Vaaierhoester meulen vanof ol middelaaiwse diek dij t dörpke beschaarmde tegen zee.’